Isang lalaki ang nakalimutan ang password ng kanyang device kung saan nakatago ang kanyang 400 milyong dolyar. Sampung beses lamang maaaring subukan ang password at kapag lumagpas dito ay hindi na mabubuksan ang device. Walong beses na siyang nagkamali sa password sa loob ng sampung taong pilit na pag-alala rito. Noong 2021, malungkot niyang sinabing may dalawang pagkakataon na lamang siyang natitira bago mapunta sa wala ang lahat ng pinaghirapan niya.

Makakalimutin talaga tayong mga tao. Madalas nating nakakalimutan ang maliliit na bagay o maging ang mahahalagang mga bagay. Mabuti na lamang at hindi natin katulad ang Dios. Hindi kailanman nakakalimutan ng Dios ang mga bagay at mga taong mahahalaga sa Kanya. Sa panahon ng pagsubok, natakot din ang bansang Israel na nakalimutan na sila ng Dios. “Pinabayaan na tayo ni Yahweh. Nakalimutan na Niya tayo” (ISAIAS 49:14 ᴍʙʙ). Pero tiniyak sa kanila ni Propeta Isaias na hindi nakakalimot ang kanilang Dios. Sinabi ng Dios, “Malilimot kaya ng ina ang sarili niyang anak? Hindi kaya niya mahalin ang sanggol niyang iniluwal? Kung mayroon mang inang lumilimot sa kanyang anak, hindi Ko kayo kakalimutan kahit sandali” (TAL. 15 ᴍʙʙ).

Sinabi rin ng Dios, “Hinding-hindi Kita malilimutan. Pangalan mo’y nakaukit sa Aking mga palad” (TAL. 16). Tandaan nating hindi tayo kalilimutan ng Dios. Hindi Niya kailanman kalilimutan ang mga taong minamahal Niya.